Deepika, Sonam aser Aishwarya nunger Cannes Film Festival nung adentsü

Mumbai, April 28 (Agencies): Taruba ita 70 buba Cannes Film Festival nung India nunger actress- Deepika Padukone, Sonam Kapoor aser Aishwarya Rai Bachchan nungertem adentsü.
Aishwarya-i 2002 aser Sonam-i 2011 nung Cannes nung ajemoka liasü aser Deepika-i taküm nungi iba benjung tulu nung mezüng tetsüng ajemoktsü.
Par asemi cosmetic brand L’Oreal Paris ajungkettsür aser iba film benjungmung nung maneni L’Oreal Paris ajungkettsütsü.
Par asem den Hollywood celebrity ana- Julianne Moore aser Eva Longoria nungertemi L’Oreal Paris tenüng nung shilem agitsü.
“Aishwarya Rai Bachchan, Deepika Padukone aser Sonam Kapoor nungertemi taküm Cannes Film Festival nung L’Oreal Paris aser India tenüng nung shilem agitsü. L’Oreal Paris-i Cannes atema official makeup partner asütsü tenzüker taküm agi küm 20 ajunger aser iba jagi taküm benjung ya khenyongi balaka asütsü” ta L’Oreal Paris General Manager, Raagjeet Garg-i metetdaktsü.
Cannes Film Festival ji May 17 nungi 28, 2017 tashi amungtsü.