DEF Kohima nung moko indang sensitization programme agi

Dimapur, November 3 (TYO) : November 3, 2105 nü S.P Office conference hall Kohima nung DEF Kohima kübok police jawans asoshi sensitization programme ka ayongzüka agi.
Iba sentong nung shisalen sayurji Dr. H. Hotokhu Chishi, Joint Director Dental & State Nodal Officer NTCP, Directorate Health & Family Welfare Nagaland liasü aser S.P office o DEF Kohima kübok Police Stations balala nungi jawan temi shilem agi.
Dr. Chishi-i meimchir aser lipoküm asoshi moko ajanga timtem bener arutsüba onüktem metetdaktsü aser paisa ashiba agi, Nagaland nung moko achiba khuretji tangar dang nungi balaka, kechiyong asenoki smokeless & smoking naprong achir.
Asenoki Nagaland nung moko achiba indang khuret angatettsüla aser moko achiba azüoktsü atema asenoki temulung agüja mapa inyaktsü. Alima nung meimchir taküm samatsüba rongnung tongtipangji moko achiba ya lir aser iba ya noktangteter, ta Dr Chishi-isa police tem ayongzük.
Paisa oral cancer dak sendakba tashidak 115 indang osang metetdaktsü aser tatem nung pai police jawan tem dang “Choose Life Not Tobacco” olen ajanga tayongzükba agütsü.