Defence Minister-i anir Kargil rara nung taküm bendanga agütsürtem tushi

New Delhi, July 26 (Agencies) : Defence Minister Manohar Parrikar den service chief asem – Army chief General Dalbir Singh Suhag, Air Chief Marshal Arup Raha aser Navy chief Admiral RK Dhowan nungertemi Amar Jawan Jyoti nung Kargil rara nung taküm bendanga agütsürtem tushiogo.
Ita ana ser anogo ishika rara nung Indian Army nungi jawans aser officers 490 tashi taküm sama aser tanü parnok nem akhümtsübu agütsüdang, Army-i linük sensosangertem dang Kargil rara sülen parnok tashi itshiogo anungji linük arrtsü kümzüka ayuba mapa nung arentaka bilemtsüsa khuret kecha mali ta metetdaktsü.
“Onoki arrtsü anatsülen (Pakistan aser China den) tashi itshiogo. Kargil rara matalokdang brigade ka dang liasü saka tangbo division ka lir” ta Northern Army Commander, Lt General D S Hooda-i Drass nung osangbenertem dang ashi.
“Ni linük nung senso ajak dang temulung uluang ta ayongzüker. Onok arrtsü nung lir aser onoki rara akoktsü renema lir” ta Lt General D S Hooda-isa ashi.
Ajisüaka, tanü Kargil Vijay Diwas mungaka Jantar Mantar nung defence services veteran temi One Rank, One Pension scheme atema lungkak aitba sentong ka ayongzüka agi.
Iba sentong nung social activist aser taoba mapang sepai inyaker Anna Hazare aden aser pai ashiba agi, OROP onük tali metetdaktsütsü atema pai sentongtem ayongzüka agitsü aser October 2 nü Ramlila Maidan nung lungkak aitba sentong ka agitsü.
“Kargil Vijay Diwas ya o jembitsü anogo ka masü. One Rank One Pension mapa küma inyaktettsü atema onoki kechi kokdir inyaktsü. Ni state balala sema senzütsü aser OROP indang sentongtem ayongzüka agitsü” ta Hazare-i ex-defence personnel nunger dang ashi.
Prime Minister Narendra Modi-ia Kargil rara nung Indian armed forces-i shilem tajung agiba atema tenüngsang agütsü.
Iba rara nung linük atema taküm bendanga agütsür nem ni tetushi agütsür. Kargil Diwas ajanga asen Indian armed forces-i bendanga agüja inyakba bilemtetdaktsür, ta Modi-i ashi.
Kargil jila ya Srinagar nungi kilometre 205 shi pilar lir aser Line of Control anasa Pakistan-i Northern Areas ta ajaba den anasatepa lir.