Defence Minister-i indo-Myanmar semdangtsü

Kohima, Monupii (May) 29 (TYO): Union Defence Minister, Nirmala Sitaraman-i anogo ananü atema Nagaland semdangi arua lir.
Tanü Nirmala-i Dimapur tonga aruba sülen Rangapahar, Dimapur nung Army indang Spear Corps Zone semdang, ta PRO Defence C Konwer-i ashi.
Iba mapang General Officer Commanding of Spear Corps, Lt Gen Gopal R, AVSM, SM-i Defence Minister dang counter terrorist mapa inyakba den North East state tem nung Indo-Myanmar arrtsü anükba dak sendakba osang metetdaktsü.
Asüng Union Defence Minister-i Nagaland sector nung Indo-Myanmar arrtsü semdangtsü, ta PRO-isa metetdaktsü.
Arrtsülen lai Spear Corps-i inyakba mapatem reprangdangtsü aser arrtsü anüker Assam Rifles ketdangser aser sepaitem den sensaksemtsü, ta paisa ashi.
Asüng nikongtsütsü Defence Minister Delhi-i meyipa aotsü saka la maodang arrtsülen aliba nisungtem den ajurutepa sendaksemtsü ta PRO defence-isa metetdaktsü.