Defence Minister Parrikar-i China nunger ketdangsertem ajurutsü

New Delhi, April 16 (Agencies): Honibarnü nungi tenzüka Defence Minister, Manohar Parrikar-i China anogo pongunü semdangba mapang pai China yimtenren lenirtem aser mitkar tongti ketdangsertem den senden mena onük balala jembitsü.
UN nung India-i JeM tongti, Masood Azhar nokdangtsü atema inyakba maparen nung China-i tetsükdaktsü bener arutsüba ajanga linük ana tesentaktep kongshir aliba mapang ka nung India Union defence minister-i iba linük semdanger.
Iba dak sentakba nung Defence Ministry osang ka ajanga, minister-i China semdangdang linük ana mitkar tesentaktep tajungba akumtsü atema jembitsü aser arrtsü onüktema jembitsü, ta ashi.
2013 küm sülenbo India defence minister kati China mezüng semdangsangji Parrikar lir. Taoba mapang Defence minister, A K Antony-ia China semdanga liasü.
Parrikar-i China nunger yimtenren tongti lenirtem aser defence ketdangsertem ajurua jembitsü imlar, ajisüaka tezüngzüktep meyanglutsüa akok, ta ministry osang ajangasa ashi.
Yaküm Central Military Commission (CMC) Vice Chairman, General Fan Changlong densema China mitkar tongti ketdangsertemia India semdanga liasü.
CMC nung tongtiji China Tir, Xi Jinping lir aser Peoples’ Liberation Army sepai million 2.3 madak pa tongti lir.
Linük ana tsüngda arrtsü kilometer 3,488 indang nung mepetmesü lir, aser itemji bentettsü atema Working Mechanism for Consultation & Coordination züngsemtem lir. Tang tashi nung parnok tsüngda senden 18 ben menogo.