Defence Minister Sitharaman-i IAF pilot, Abhinandan ajuru

New Delhi, March 02 (Agencies): Tanü Union Defence Minister, Nirmala Sitharaman-i India nunger IAF nung Wing Commander Abhinandan Varthaman, ajuruogo.
Yasüng Attari-Wagah Border check post nung Pakistan linüki India ket nung pilot, Abhinandan agutsüba sülen pa Delhi-i anir arua liasü.
Tanü Sitharaman-i IAF officer, Abhinandan tang medical test agiba tesem military hospital nung pa ajuru. Defence Minister-i pa dang tesüiba anogo ishika tsüngda tatalokbatem aser Pakistan nungeri pa apuba indang metetpelaa liasü.
Defence Minister-isa pa dang pa pua aliba mapang nung Pakistan nungeri pa koma anepalu, ta asüngdang.
Tanep Wing Commander Abhinandan-i Air Chief Marshal Birender Singh Dhanoa ajurua aser pa dang Pakistan nung pa apuba indang lemsatepa liasü.
Tanep Abhinandan medical check-up agiogo aser pa Indian Air Force Officers Mess nung alitsü. Pakistan-i ghonda 5 shi menoa Wing Commander Varthaman magutsüba sülen yasüng 9:20 ako meta pa India atong.
Bodhbarnü pa parachute nungi aludang Pakistan-occupied Kashmir nung tsükba mapang nungi yasüng tashi Pakistan nunger ket nung liasü.
Bodhbarnü Abhinandan-i MiG 21 Bison tayimtsü agi Pakistan nunger F-16 fighters tayimtsü arishi, aser iba mapang nung pai aniba tayimtsüji Pakistan tsütsüleni oa tsükchirtemi kazüka yok, saka pabo tayimtsü nungjagi ‘eject’ asü saka tsükchir litsü nung anena tsükchirtemi pa apu.
Iba sülen Hokolbarnü Pakistan Ato kilonser, Imran Khan-i, yimjung temaitsü parnoki Abhinandan chioktsü, ta sangdonga liasü.