Defence Ministry-i Army nung jang tepsetba sobaliba anentsür

New Delhi, October 30 (Agencies): Linük nung kiset shiruru kar tepsetba dak sentakba nung mangatettep adoka aliba mapang aser o toktepba mapang ka nung ano iba onük tuluba küma aotsüsa tanü Defence Ministry-i army dang, army unit kari (Gurkha) jang tepsetba sobaliba benshiba maparen anenang, ta tuyuogo.
Hokolbar nü Economic Times (ET) osang ka ajanga ashiba agi, Defence Ministry-i army tem dang, Gurkha sobaliba den kanga sentaktepa aliba- Dussehra benjung mapang jang tebong (Rango) tekolak tangzüka tepsetba anenang, ta tuyuogo.
“Iba ya sobaliba tejen yimya ka lir, aser ibaji tejangja, saka tangbo iba sobaliba ya India ozüng anema lir. Shiruru tepsetba atema ozüngtem lir aser iba yimya nung shiruru tenla agütsübaji temzüngtem anema lir,” ta Defence ministry nung tongti ketdangser kati ashiba ET osang ajanga metetdaktsü.
Ano tanga osang ka ajanga ashiba agi sorkari, “Nisung karibo iba sobaliba yimya benshinütsü akok ta angateter. Ibaji nüngdak ka süra, temzüng nung aliba ama inyaktsüla, aser shiruruji sorkari shiruru tepsettsü atema temelaba agüja aliba shiruru tepsetba kidangi bener oa tepsettsüla,” ta ashi.