Defence Ministry ket nungi Rafale deal kakettem auya: AG

New Delhi, March 06 (Agencies): Tanü Centre sorkari Supreme Court (SC) dang, Rafale deal dak sendakba tongtibang kakettem Defence Ministry ket nungi auyaogo, ta metetdaktsü.
Sorkar tenüng nung Attorney General, K K Venugopal-i Supreme Court dang, iba ken o reprangshitsü atema mepishiba ajungaji auyaba kakettem nung metaloker, ta ashi.
Tanü judge asemi akumba bench- Chief Justice Ranjan Gogoi aser Justices S K Kaul den K M Joseph nungeri open court nung iba ken o angadangba mapang nung taoba mapang Union ministers- Yashwant Sinha aser Arun Shourie na den advocate Prashant Bhushan nungeri, yaküm December ita nung SC-i Rafale deal anema ken otem agientsüba mapang nung sorkari tongtibang osangtem miimbanga yuogo, ta ashi.
Bhushan-i Sinha, Shourie nunger ajak tenüng nung “FIR aser bushisüngdangtsü atema file asuba mapang nung Centre-i Rafale dak sendakba osang ajak miimbanga ayu,” ta ashi.
Bhushan-isa, Centre sorkari item osangji agutsü asübo FIR aser Rafale deal bushisüngdangtsü atema mepishibaji agizüker lila, ta ashi.
Bhushan-i, The Hindu osangkaket nungi ocet ka zünga metetdaktsü saka AG Venugopal-i ibaji anema, ‘iba ocetji auyaba kakettem nungi lir, aser tang iba dak sendakba bushisüngdangdar’ ta ashi.
Rafale ken o tanaben reprangshitsü atema mepishiba magizükdaktsütsü asoshi Venugopal-i kanga meranga jembi, iba sülen bench-i pa dang, iba ocet osangkaket nung adokdang Centre sorkari kechi inyak, ta asüngdang.
Iba ken o ya maneni March 14 nü angadangtsü.