Delhi Ao Kaketshir Telongjem 30buba Freshers’ Meet agi

Delhi/Dimapur, September 30 (TYO): September 28, 2019 nü Nagaland House, New Delhi nung Delhi Ao Kaketshir Telongjem-i 30buba Freshers’ Meet ayongzüka agiogo; iba sentong nung nisung 200 dak tema aden.
DAKT Tir, Rongsensuwa Jamir-i tejaokertem aser lokti pelaa agizükba sülen omen “Telongjem Nung Terenlok” teratet metetdaktsü.
Delhi Ao Senso Telongjem Tir, Dr. Walunir Tzudir-i kaketshirtem dang tensa mapang den apet asen sempet arangshitsü aser shisatsü bushir ka dang masü saka shisa agütsür kaka asütsü ayongzük.
Sentong nung tongti o jembir Jamia Millia Islamia New Delhi nung Assistant Professor, Dr. Imosongla Jamir-i, linük rongsenkettsüng ajungkettsüba nung lanurtem koda tongtibang iba indang lemsatepba den külemi linük tejakleni anirtem telok rongnung adentsü ajungshi.
Tayongzükba o jembidang Wt. Tarenla Imchen-i tetsü oshi koda tongtibang, iba indang lemsatepba den külemi tanü lima nung asenoki asen sobaliba wazüka ayutsüji kanga tongtibang, ta lemsatep.
Freshers tenüng nung Kilemjungla Lemtur-i jembia liasü. Sentong nungsa sobaliba jilushi ka aiba den ken ka aten, iba sülen ‘Musique de la Nuit’ omen nung informal session ka agia liasü.