Delhi aser Haryana nati anogo ananü Sushma atema mangyimtsü

New Delhi, August 07 (Agencies): Taoba mapang Chief Minister aser External Affairs Minister, Sushma Swaraj Mongolbar aonung ajungbena asüba sülen tanü Delhi sorkari la atema anogo ananü mangyimtsü, ta sangdongogo.
Delhi Deputy Chief Minister, Manish Sisodia-i, Delhi nung sorkari Sushma Swaraj atema anogo ananü mangyimtsü, ta microblogging site Twitter ajanga sangdong. Sisodia-i, “Taoba mapang CM aser lenir tain, Sushma Swaraj nem akhüm agüja Delhi sorkari anogo ananü mangyimtsü,” ta metetdaktsü. Sisodia-i tweet asübaji Delhi Chief Minister Arvind Kejriwal-ia tweet asü.
AAP tongti, Kejriwal-i, “Sushma ya taoba mapang Delhi Chief Minister liasü. Delhi-i la nem akhüm agüja anogo ananü mangyimtsü,” ta metetdaktsü.
Ano Haryana sorkaria BJP lenir tain, Sushma Swaraj nem akhüm agüja anogo ananü mangyimtsü, ta sangdongogo.
Tanü linük yimtiba Delhi kübok Janpath Area nung Sushma’er kidang Tir, Ram Nath Kovind, Ato kilonser, Narendra Modi, Union Home Minister Amit Shah, taoba mapang Ato kilonser aser Congress lenir, Manmohan Singh, Union Defence Minister, Rajnath Singh nunger densema yimtenren party balala nungi lenirtem adenshia la nem tatembangbuba akhüm agütsüogo.
Tanü Ato kilonser, Modi-i Sushma Swaraj kinüngbu, Swaraj Kaushal aser lar jala, Bansuri Swaraj na ajurua mangyim lemsatep.
Tesülen osangbenertem den jembidang Amit Shah-i, Sushma Swaraj ya petinu ka lir, la ajungben asüba ajanga India nunger yimtenren nung tapok tuluka apatsü, ta metetdaktsü,
Shah-isa, pa densema BJP nung inyakertem ajaki jashia mangyimer, ta ashi.
La nem tatembangbuba akhüm agütsütsü atema la tasümang anüngdang 12:00 ako nungi nikongdang 3:00 ako tashi BJP headquarters, Delhi nung ayuba sülen Lodhi Crematorium-i bener oa asüpila sentong agir tasümang rongdok.