Delhi assembly nung VHP lenir Singhal nem akhüm magütsü

New Delhi, November 18 (Agencies): Yashi Vishva Hindu Parishad (VHP) lenir Ashok Singhal asüba sülen tanü Delhi assembly senden mezüngnü pa nem akhüm agütsütsü BJP-i takhangba agüja, ajisüaka iba takhangbaji magizükba ajanga assembly nung BJP aser AAP na tsüngda rongrong adok.

Menden 70 aliba Delhi assembly nung BJP züngsem asem-i, sorkar tashi nung aliba Aam Aadmi Party (AAP)-i Uttar Pradesh, Ayodhya nung Babri Mosque alitak Hindu tekulem ki yanglutsü atema lenisang VHP lenir magizüker ta aitsü.

Tanü Delhi assembly nung tawa Paris yimti nung kiralongrartemi amakba lendong nung asürtem nem akhüm agütsüba sülen party ana tsüngda rara adoka liasü.

“Ashok Singhal ji ‘Raj Purush’ ka liasü, ta BJP MLA Vijender Gupta-i shia asür nem akhüm agütsütsü atema takhangba agütsü. Ajisüaka Somnath Bharti aser Amantullah Khan na densema AAP MLA temi ola tashii adoka iba takhangbaji magizük.

AAP MLA temi, VHP lenir Singhal-i telemsa adoktdaktsüba shilem agia liasü, ta aitsü.

Ano assembly Speaker, Ram Niwas Goel-ia, Ashok Singhal ji Temzüng menden ka nung danga maliasü ta shia iba takhangbaji magizük.

Tesülen AAP züngsemtemi, Ashok Singhal tenüngji records nungi agientsü benoka liasü.

Tanü nikongdang iba senden tenzükba mapang Chief Minister Arvind Kejriwal bo maliasü.

Arishi küm 89 Ashok Singhal yashi Gurgaon hospital nung asü. VHP ya RSS den affiliate süa lir.