Delhi & Bengaluru airport nung bomb osang ajanga tayimtsü 3 sota ayu

New Delhi, January 27 (Agencies) : Bodbarnü Delhi aser Bengaluru airport tem nung bomb lir ta amokmerenba osang pezü sangoktsüba ajanga kanga petsaprongtepogo aser airport ketdangsertemi tayimtsü asem sota ayutsüsa aküm.
Ketdangsertemi sota ayuba tayimtsü asem rongnung anabo international flights liasü.
Indira Gandhi International Airport (IGIA) nung Kathmandu-i aotsü aliba Air India aser Jet Airways tayimtsütem sota ayu aser Bengaluru nunga AirAsia indang Goa tayimtsü sota liasü.
“Tanü nikongtsütsü 1:00 ako meta mejangjatetba nisung kati airport police dang phone ajanga bomb lir ta osang sangoktsü. Air India aser Jet Airways tayimtsütem nung laptop bag ana nung bomb bena lir ta ashi” ta Deputy Commissioner of Police (IGIA) DK Gupta-i osangbener dang ashi.
Iba osang angazükli, ketdangsertemi tayimtsü anaji sota ayu aser bushisüngdangtsü tenzük. Iba mapang Air India nung nisung 121 aser Jet Airways nung nisung 122 mena liasü.
Delhi nungi Kathmandu-i aoba Jet Airways tayimtsüji tanü nikongtsütsü 1:25 ako nung apusoa aotsüba liasü saka osangji ajanga taonung 7:50 ako nungang security clearances ngur apusoa otet.
Ano, Air India tayimtsüji tanü nikongtsütsü 1:15 ako nung Kathmandu-i aotsüba liasü saka taonung 7:50 ako nungang apusoa ao. Bomb aliba mezüng osang sangoktsüba sülen ketdangsertemi security check up asüdang ano iba tayimtsü nung bomb aliba osang ka tanaben sangoktsü. Iba jagi ketdangsertemi tanaben tayimtsü mita reprangshi, ta Air India otongdar GP Rao-i metetdaktsü.
Kasa mapang nung AirAsia India indang Bengaluru nungi Goa tashi tayimtsü sota ayu. Jaipur nungi aruba AirAsia India tayimtsü nung bomb bena lir ta osang ka sangoktsüba agi Goa-i aoba tayimtsüji sota ayu.