Delhi CM Kejriwal dak tsüngsem mereploktsü

New Delhi, April 09 (Agencies): Honibarnü New Delhi nung osangbenertem senden ka nung tebur kati Delhi Chief Minister, Arvind Kejriwal dak tsüngsem ka mereploktsü.
Tanü osangbenertem senden nung AAP tongti lenir aser Delhi CM, Kejriwal-i Delhi nung ano maneni odd-even scheme benoktsü atema sangdonga liasü.
Aibelensangji Aam Aadmi Sena nungi Ved Prakash lir, ta jangjaogo. Pai ashiba agi, Delhi nung CNG ochimashi ken o nung pai AAP anema sting operation ka agiogo.
Delhi nung odd-even vehicular scheme benoktsü lia CNG sticker taila lemtsüogo ta pai aitsüba den külemi pai, sting operation video CD ji pa ket nung lir, ta ashi.
Tsüngsem jagi Kejriwal dak memerepshi, aser nisungbaji Aam Aadmi Party (AAP) züngsemtemi puer ao. Iba tatalokba sülen Kejriwal-i maneni osangbenertem den jembia liasü.
Iba tatalokbaji BJP aser Congress Party napronglai aitsüogo.
Congress Party-i, “Iba ama tatalokbaji kecha agia metentsü makoktsü. Melung masüba atema süngjema ola adoktsü lenmang aika lir,” ta ashi.
Ano BJP lenir, Nalin Kohli-ia, “Ibaji aitsütsüla, item ama tatalokba malitsü atema langa latettsü nüngdak,” ta ashi.