Delhi CS dak teka sangshibaji aitsür: IAS Associaion Nagaland

Kohima, Tsüklai 23 (TYO): Tsüklai 19-20, 2018 aonung Delhi CM’er kidang Delhi Chief Minister-a lia MLA temi Delhi Chief Secretary dak teka sangshibaji IAS Association, Nagaland-i aitsür, ta tanü IAS Association Nagaland Tir, Sentiyanger IAS-i sangdong ka ajanga metetdaktsü.
“Iba ya ozüng alema inyakba, tasümait mapa ka aser aitsütsü tetemsü lir, aser tagizüktetla masü. Onoki Delhi nung külem tenzükertem (IAS) nungita iba ama taaktsü maket mapa inyakertem tangsa aputsü akhanger,” ta IAS Association Nagaland-isa metetdaktsü.
“Association-i India sorkar dang linük tesem ajaklen külem tenzükertem kümzüka ayutsü atema inyaktsü mepishir, iba den külemi ozüng kübok tapet Arrla nung ajemdaker aibelenertem merenshitsü akhanger,” ta sangdong nung shia lir.
“IAS officers kümzüka ayutsü aser parnok security nung tamakok ngura ibaji ajanga inyakyim nung timtem adoktsü aser yimsüsüba jenjang raksatsü. Anungji iba ama tia maka tatalokba nung aibelenertem nem ajaki tatishitsü agitsüsa temerenshi agutsütsüla,” ta kasa sangdong ajanga metetdaktsü.