Delhi doctor tema dengue aser chikungunya agi shiranger

New Delhi, Sept. 01 (Agencies) : Linük yimtiba nung Dengue aser chikungunya agi nüburtem dang masü saka doctor tem dena shirangtepdar aser ibaji ajanga yimti nung aliba mozükitem nung staff agi anünga akümer.
Doctor aika den mozü kidang inyaker tain aika Dengue aser chikungunya positive putetba ajanga mozü ki nung staff agi kanga anünga kümogo, ta Brihostibarnü ketdangsertemi IANS dang ashi.
Sorkar indang Safdarjung mozüki osang ka ajanga metetdaktsüba agi, mozü kidang inyaker tain 10 nungi 12 shi dak chikungunya keta aliba putetba den külemi ano doctor 25 tashi chikungunya aser dengue agi shirangdar.
Metet meteta tang Safdarjung mozü kidang staff noklang nung shilem 30 agi anünga kümogo.
“Tang chikungunya aser dengue agi shiranger doctor aika rongnung karbo mozü kidang mongdar aser aika sodi agir kidang mozü agia mongdar kechiba süra dengue agi shiranger anepaluba ward ji shiranger agi sünger tesem tazüng khenyongi mali,” ta Safdarjung Hospital nung Medical Superintendent A.K. Rai-i IANS dang ashi.
“Tang onok doctor ishika dang anünga lir aser iba den külemi mozü kidang yipten meperi akümba ajanga aiben mangatettep adoker,” ta Rai-i shisem.
Ano Ram Manohar Lohia (RML) mozü kidanga chikungunya agi shiranger parnok 175 lir aser parnok rongnung nisung 30 shi yangi inyaker doctor tem lir, ta mozüki ketdangsertemi ashi.
“Mozü kidang inyaker tang chikungunya aser dengue agi shiranger parnok pungo bo ni kanga junga meteta lir. Doctor ajak agi 30 nungi 35 iba tashidak agi tonger shirangdar,” ta RML Hospital atema otongdar V.K Sinha-i IANS dang ashi.
Delhi nung dengue aser chikungunya agi shirangertem asadangba telok, South Delhi Municipal Corporation-i ashiba agi, August 27 tashi nung yimti nung dengue agi shranger 487 aser chikungunya agi shiranger 432 puteta lir.
Ano North Delhi nunga dengue agi shiranger 98 puteta lir.
Ganga Ram Hospital nunga yangji inyaker doctor 20 tashi chikungunya aser dengue agi shirangdar.