Delhi Dynamos FC nung Emerson Gomes aniokogo

Gothenburg, September 8 (Agencies) : Aruyaa aliba Indian Super League 3 asayamong nung shilem junga agitettsü nükjidong nung Delhi Dynamos FC-i par telok nung Brazil nunger midfielder Emerson Gomes de Moura anioksemogo.
Bendanger asayar aniokba rongnung arishi küm 28 tain, midfielder Gomes ya Delhi Dynamos nung tang tesüsa buba asütsü.
Pa aniokba ajanga midfield nung tashi aitba dang masü saka team rangben tashi itshitsü.
Pa dang Memo taa ajar aser pai Brazil nung aliba club aika atema asayaogo. Pai Brazil nung Santa Cruz, Botafogo-PB, Ponte Preta aser America F.C dena club ajak agi 128 atema asayaogo.
“Kanga kara renloka aoba asayamong ka nung asayatsü shimokbaji ni atema maongka tulu lir aser ibaji atema ni Delhi Dynamos ketdangsertem dang kanga pelar. Asayar tajung Roberto Carlos nunger tesüiba ISL asamong ana tashi nung asayaba sülen nungi Brazil nunga ISL indang kanga jembir. Ni atemabo ibai tajangshiba tasen ka asütsü,” ta Memo-i ashi.
Head coach Gianluca Zambrotta-i, Memo aniokshiba atema pelaba lemsatep aser pa adenba ajanga tan ISL nung Delhi Dynamos FC telok tali tashi taitba asütsü, ta ashi.
“Pa aitba ajanga midfield nung kanga tashi aittsü. Pa Brazil nung club aika nungi asayaa aruba nisung lir aser ni amanger pai ajangshibatem ajanga team kanga yaritsü,” ta Zambrotta-i ashi.