Delhi election nung Gautam Gambhir BJP nungi tokteptsü

Luroi/August 19 (Agencies): Osangtem angazükba shitak süra India nunger cricket asayar tejen Gautam Gambhir-i yimtenren nung ajemoka Bharatiya Janata Party (BJP) telok nung adentsü atema ternemba lir, aser pai Delhi nung taruba general election nung tokteptsü.
Dainik Jagaran sangdong ka ajanga angazükba agi, mapang talangka atema Delhi nung BJP teloki yimsü mesüi dang arudar; iba yongji linük yimtiba nung ano tanaben BJP amenoktsü atema Gautam nem ticket ka agütsütsü atema mulunga dang lir. Tang Delhi state nung Aam Aadmi Party (AAP) teloki yimsü südar.
Cricket asaya arur sülen saisaponger rongnung yimtenren mapa nung ajemokba ya Gambhir mezüng masü. Taoba mapang Navjot Singh Sidhu, Mohammad Kaif, Praveen Kumar, Vinod Kambli aser Mansoor Ali Khan Pataudi nungera cricket asaya arur sülen yimtenren nung ajemoka lir.
2012 nungi Gambhir-i ODI cricket asayamung nung shilem agidanga mali. 2016 küm tatemsa England den Gambhir-i India atema Test cricket asayaogo. Arishi küm 36 tain Gambhir-i Test Match 58 nungi run 4,154 aser ODIs 147 nungi run 5,238 ngutetta lir. T20I World Cup 2007 aser World Cup 2011 nung Gambhir-i India takoki aniba nung tongti shilem agia lir.
Indian Premier League (IPL) asayamung ana tashi nung Gambhir-i pa indang taoba telok ‘Kolkata Knight Riders’ (KKR) takoki anaben tashi angiogo. Taküm küm IPL asayamung nung Gambhir lenisüba kübok Delhi Daredevils teloki shilem agi saka par telok atonga tamakok anguba ajanga pai pa sasa captain nungi anenadok.