Delhi HC-i Kanhaiya nem ita 6 bail agütsüogo

New Delhi, March 02 (Agencies): Jawaharlal Nehru University kaketshir telongjem Tir, Kanhaiya Kumar anogo 20 tashi tepouktak aliba sülen Bodhbarnü Delhi High Court-i pa nem Interim bail ita trok agütsüogo.
Justice Pratibha Rani-i aniba bench-i Kanhaiya Kumar dang linük anemba maparen kecha nunga shilem magitsü nangzükdakja bail bond sen 10,000 nung bail temelaba agütsüogo. Court-isa JNU faculty züngsem kati Kumar tenüng nung kulisür asütsü tetuyuba agütsü.
February 9, 2016 nü JNU campus nung linük anema yimyim ayim ta tai tongloktsüba sülen Kumar ya February 12 nü ozüng alema inyakba aser sorkar anema apusoba ken o nung tai tonglokja apu.
Kanhaiya-i, India anema pai yimyim mayim ta shia bail meshi, saka Delhi Police-i High Court dang pa anema kuli lir, ta shia pa nem bail magütsütsüla ta noktak.
Mongolbarnü osang ka ajanga ashiba agi, JNU nung linük anema yimyim ayimba video tenet forensic tendangba sülen item rongnung video clip asembo taila liasü aser video noksatemji kanga junga ajidangra Kanhaiya-i linük anema yimyim ayima mali.
Ano Magistrate report nung ashiba agi, JNU campus nung ayonga akaba sentong nung ‘Pakistan Zindabad’ ta yimyim mayim aser rara adoktsüsa amshia aliba orentemji taila lir. Iba report ya kaket tapak 25 nung February 9 nü tatalokba nungi ken o benokba tashi tatalokbatem tatongi shia lir.
Kasa report nung, BJP indang youth wing ABVP-i TV reporter ka JNU campus jagi jaoka liasü, ta shia lir.