Delhi High Court-i BJP lenir asem anema FIR benoktsü tuyu

New Delhi, February 26 (Agencies): Bodhbarnü Delhi High Court-i police dang Citizenship Amendment Act (CAA) anema longkak aitdang rara adokba dak sendakba nung BJP lenirtemi tesempa o jembiba atema parnok anema FIR benoktsü tuyuogo aser Brihostibar tashi nung iba osangji court nem metetdakjang, ta tuyuogo.

BJP lenir asemji Kapil Mishra, Anurag Thakur aser Parvesh Verma nunger lir.

Justices S Muralidhar aser Anup J Bhambhani nati akümba bench-i ken o angadangba mapang nung Special commissioner of Police, Praveer Ranjan-i pai tanü police commissioner den iba atemaji jembitsü aser tesempa o jembiba video clips ajungaji reprangdangba sülen FIRs benoktsü atema telemtetba agitsü, ta shiogo.

Delhi police-i tensa junga mazüoktetba dak sendakba nung High court-i Special Commissioner of Police dang court mepelaba osangji Delhi Police Commissioner nem metetdakjang, ta tuyu.

Iba ken o ya maneni Brihostibarnü angadangtsü.