Delhi Jawaharlal Nehru Stadium-a FIFA U-17 World Cup asayatsü atema shimogo

New Delhi, October 23 (Agencies) : Deobarnü India yimtiba New Delhi-a sangküm U-17 football World Cup asayatsü atema tesem pezübuba kümogo ta metetdaktsü.
FIFA züngsem 13 aser Local Organising Committee (LOC) züngsem 10 New Delhi-i arua U-17 football World Cup asayatsü temelaba agütsü, ta sangdong ka ajanga metetdaktsü.
Parnoki Jawaharlal Nehru Stadium Complex kanga junga mita reprangba sülen iba telemtetba agi aser sorkaria complex telung nung training agiba tesem ana dena kechisarena yanglushiba mapa March 2017 tashi nung tembangtsü nangzükogo.
All India Football Federation (AIFF) General Secretary Kushal Das-i, “Onoki linük nung aliba stakeholder tem den mezüng nungi iba mapa inyaktsü tenzük aser tang asenoki iba süngjangji asaya moapu nung angur,” ta ashi.
“FIFA-i tang tashi semdanga aruba asaya moapu ajak agi temulung süogo aser ibaji ajanga taruba küm asayatsü aliba asayamung tulu atema temulung lema bilemer. FIFA U-17 World Cup India 2017 asayamungji India nunger football asaya meimer ajak atema tamamatsü mapang ka südaktsütsü merangtsü,” ta pai ashi.
LOC nung Tournament Director, Javier Ceppi-i, “Yangi joko maparen ajak tenzükogo aser item mapa junga tembangtettsü onoki imlar. Mapang tera tali agiogo ajisüaka asayamung matong dang mapa ajak tembanger tendangtsü onok tamang,” ta ashi.
“New Delhi nung iba asayamung takok ngua asayadaktsütsü aser tesem yanglushiba mapa bilemba ama inyaktettsü atema onoki Ministry of Youth Affairs & Sports (MOYAS) aser Sports Authority of India (SAI) na den amalitepa inyaka arudar,” ta pai ashi.
Iba metetdaktsüba mapang MOYAS Director- Sports Sagarpreet Hooda, SAI Director, – Infrastructure Sanjiv Baranwal, Project Director LOC Joy Bhattacharjya aser FIFA nungi U-17 World Cup atema Event Manager Marion Mayer-Vorfelder nungera liasü.
FIFA U-17 World Cup India 2017 atema Kochi, Navi Mumbai aser Goa nung aliba stadium tem shimba sülen Delhi Jawaharlal Nehru Stadium ya pezübuba asütsü.