Delhi Metro nung sen mamshir, Bharat QR Code ajanga sen agütsür

New Delhi, July 04 (Agencies): Delhi Metro nung jajartemi mobile banking application amshia ‘token’ alitettsü aser parnok indang smart card recharge sütettsü, ta Delhi Metro Rail Corp (DMRC) ajanga sangdong ka nung ashi.
“Token counter aser metro station indang customer care centre tem nung Bharat Quick Response (QR) code amshitsü asoshi DMRC ajanga cashless toker sale/smart card recharge facility sayaogo,” ta DMRC ajanga ashi. Iba service ya bank mashi ka nungi agitettsü aser HDFC Bank nungi agütsür.
Passenger temi app nung ‘pay through QR’ ya shimtettsü aser smartphone camera amshia ticket counter nung aliba QR code den sendakteptsü. Iba sülen passenger-i ‘fare’ ya menoktsü agütsütsü.
Tang bo iba maongka ya Metro station pongu nung dang lir aser item station ya Rajiv Chowk, Rajendra Palace, Seelampur, Pitampura aser Nehru Palace ya lir aser tanga metro station tem nunga ‘phase manner’ nung inoktsü.
“Sorkari achayanga senotsü tsütatepba maparen nung shidi sen mamshitsü ayungmesoba den yarisema DMRC-i mapa tem inyaker,” ta iba sentong sayaba mapang, DMRC Managing Director, Mamgu Singh-i ashi.
“Iba sentong tasen ajanga senzüsembonger temi Delhi Metro network tekaraba nung amshitettsü aser station nung sen tanük maliba indang timtem majurutsü,” ta Singh-i shisem.
Shidi sen mamshie senotsü tsütateptsü mechi India sorkar-i Bharat QR Code ya tawa saya aser iba code ya India nung aliba bank tongtipangtem ajunga nung amshiteter. Bharat QR Code nung ‘bar code’ keta lir aser senotsü tsütatepba mapang iba bar code ajanga bank indang temetettsü aser account number amala agütsür.