Delhi nüburtemi Odd-Even scheme aginer

New Delhi, April 29 (Agencies): India linük yimtiba, Delhi nüburtemi teti atema Odd-Even traffic mapatong kadaktsüner, ta PHD Chamber of Commerce & Industry-i survey agiba ka ajanga bushitetogo.
Delhi sorkari benokba, Odd-Eve scheme ya takok asü tamakok ka liasü (?), ibaji jangjatsü atema survey ka agia liasü, aser iba survey nung Delhi-NCR nungi nisung 1,000 dak temai shilem agi.
“Telangzür timtibai iba ozüng ya teti atema kadaktsürner, aser iba scheme teti atema kadaktsünertemji shilem 10 nungi shilem 6.2 liasü,” ta PHD Chamber of Commerce & Industry-i sangdong ka ajanga metetdaktsü.
Nisung aikati, gari lenmang nung gari ishiba senzübaji mapang kümzüktsü atema ta bilemer, ajisüaka gari tajemba senzübaji parnoki imlaba ama masü.
PHD Chamber Secretary General, Saurabh Sanyal-i, “Delhi tesem kar nungbo gari ajema kümaka, tesem kar nungbo gari masemer. Delhi tesem kar nung traffic ozüng yanglushitsü nüngdakba den lenmang network tajungba nüngdaker,” ta ashi.
Iba survey ajanga- Odd-Even ozüng ya teti benokra anogoshia gari nung senzürtemi gari talila malisemtsü, ta jangjaogo.
Ano kasa survey ajanga, April 15 nungi April 30, 2016 nü tashi rationing scheme ajanga public transport tamajungba kümogo, ta shilem 10 nungi shilem 4.3-i ashi.
“Iba ozüng takok angutsü atema talang nung aliba tesemtem sentaktepa tesem ajak nung transport angutsüsa public transport tajungba akumtsüla,” ta Sanyal-i ashi.
Survey ajangasa ashiba agi, Odd-Even ozüng ya jungjunga benoktetra yimti nung mopung menenba level ajema akumtsü.
Delhi nung mezüng Odd-Even scheme ya taküm January 1 nungi 15 nü tashi benoka liasü.