Delhi nung ABAM Youth Director tem training agi

Dimapur, April 5 (TYO) : March 31 nungi April 4, 2016 tashi Navinda retreat center, Delhi nung 2016 ABAM youth director tem training agi.
Iba sentong ya GiY(Generation Internet Youth) omen nung ajemdaker agi aser shisalen sayurtemji Pastor Jeremy, Delhi aser ABAM Youth Secy. Toshi Sanglir na liasü.
Pastor Jeremy-i “Mentoring the millennium generation” onük jembi aser iba mapang pai Youth Director tem dang Tsüngremer wadang nung alizüng tulu yur inyaktsü ayongzük.
Pai, ‘Serving an example’, ‘Shepherding a soul’ aser ‘Skilling for service’ onüktem nung tayongzükba aika agütsü.
Pastor Jeremy-i Rom 12 nung ajemdaker ministry nung tongtipang teinyaktsüji arogopur ajak dang Lai o sayutsüba lir ta ashi.
ABAM Youth Secy. Toshi Sanglir-i Giy (Generation Internet Youth) onük jembidang ashiba agi, Giy temji 1990’s mapang asortem lir ta ashi.
Giy ta asüba onük ta West nungi adok aser iba ya asen loktiliba nung lir aser parnok kanga junga anepalutsüla. Tanü putu ya Google-i anitetba, Facebook-i anepalua reprangba aser WhatsApp-i tesayuba agütsüba putu ka lir, ta paisa metetdaktsü.
Tanü lanurtemji tamajung masü saka parnokji khenyongi balaka. Tanü putu nung Technology addiction ji khuret tulu ka lir aser iba ya tashidak tamajung ka mesüka lir.  Tanü putu nung lanur lennirtemi digital world kanga rajema metettsü nüngdaker, anungji asenoki alima aser lanur den külemi otettsü atema digital world indang angazüktsüla, ta Toshi Sanglir-isa ashi.
Iba sentong nung ABAM Youth Ministry tajungba inyaksangshia aotsü aser jenjang ajungkettsü atema ABAM YM teinyaktsütem benoka olemtepba mapang liasü.
Iba training nung ABAM kübok arogo balala nungi youth director 64 tashi aden aser Deobarnü Delhi Ao Baptist Arogo tekülem sentep nung shilem agi.