Delhi nung apuba Manipur kaketshir lenir Imphal-i anir aruogo

Imphal, Luchii/December 10 (Agencies): Taoba mapang New Delhi nung police temi Manipur Students’ Association Delhi (MSAD) lenir ana pua aliba Brehostibarnü Imphal-i bener aruogo.
Patiala Court, Delhi nungi temelaba agiba sülen MSAD general secretary Thokchom Singhajit aser secretary Kennedy Moirangthem na ya Manipur police-i Imphal-i anir aru.
Manipur nung aliba school aser college tem nung Sanskrit ya subject ka ama amshidaktsütsü merangba mechi MSAD ajanga Manipur sorkar aija sangdongba dak sendakba nung tena ya Imphal West district police temi pua liasü.
State nung aliba school aser college tem nung Sanskrit ya subject ka ama amshitsü, ta Manipur Education minister S Rahen Singh-i November 20 nü sangdonga liasü.
Iba sangdong ya MSAD densema lokti tentet balala nungi ola adoka aitsü. Iba sentong ya ajanga Manipur sorkar RSS den sendaktepa aliba yimya sayur, ta kaketshir tentet yagi ashi.
Iba osang sangdongba sülen Manipur police-i Indian Penal Code indang Section 163A, 504, 505(2) aser 34 kübok FIR benok aser lenir ana ya taoba Hombar nikongdang 7:00 ako meta apu.
Mongulbarnü tena ya linük yimtiba nung aliba Patiala High Court dangi anir aru aser iba sülen tena ya Maurice Nagar Police Station nung yua liasü, ta osangtem ajanga ashi.
Tena New Delhi nungi Imphal airport tonga aruba sülen iba airport nung kaketshir activist kari MSAD busema banner tem sayua liasü.
MSAD general secretary-i mapang tatsüka osangbener den jembiba mapang, state nung aliba school aser college tem nung Sanskrit oshi benokba anema media nung MSAD ajanga osang sangdongba dak sendakba nung tena ya apu, ta ashi.