Delhi nung BJP Minister tem aser RSS senden kadar

New Delhi, September 02 (Agencies): Tanü nungi tenzüka linük yimtiba Delhi nung anogo asemnü RSS aser Hindu tentettem senden asemnü tenzükogo, aser tanü iba senden nung BJP nungi tongti minister aser lenirtem aika denogo. Tanü iba senden nung Narendra Modi’er sorkar dak sentakba tongtibang onüktem aser rongsenkettsüng onüktem nung jembiogo.

Iba senden nung Ato kilonser Narendra Modi adentsü imlar aser BJP National Tir Amit Shah-a iba senden nung adentsü.

Anogo asemnü senden nung tawa sayaba census, OROP, Gujarat nung Patel kin lungkak aitba, land bill, labour reforms aser education policy onüktem nung jembitsü akok.

Tanü senden nung Amit Shad den Finance Minister Arun Jaitley, External Affairs Minister Sushma Swaraj, Defence Minister Manohar Parrikar, Transport Minister Nitin Gadkari, Urban Development Minister Venkaiah Naidu, Chemicals & Fertilisers Minister Ananth Kumar, Health Minister JP Nadda nungera denogo.

RSS Tir, Mohan Bhagwat-i aniba senden nung maneni ano minister aika adentsü.

Sorkar minister temi Rastriya Swayamsevak Sangh (RSS) nung tongti lenir 93 aser RSS den densema aliba tentet 15 den rongsenkettsüng aser aluyimba densema tongtibang onük aika nung jembitsü, aser ‘Sangh parivar’ tentettemia jembitsü, ta osang ka ajanga ashi.

Iba senden ya Modi-i aniba NDA sorkari yimsüsüba ita 15 nung inyaktetbatem atema tenüngsang agütsüba sentong ka amai bilemer, ajisüaka RSS lenirtemibo iba senden ya sorkari inyaktetba reprangshimba senden ka masü mesüra telemtetba kar agitsü senden ka masü, ta shiogo.

Kasa osang ajanga ashiba agi, iba senden nung loktiliba, rongsenkettsüng, sobaliba aser shisaliok onüktem nung jembitsü, aser item onük dak sentakba minister tema adentsü.