Delhi nung CAA pusemer o anemer tsüngda raradang nisung 20 süogo

New Delhi, February 26 (Agencies): Northeast Delhi nung tamangba lokti ana tsüngda raraba mapang nung asürtem nisung 20 jungogo.
Tamangba yimsü telok ana tsüngda anogo asemnü tashi rara arudar, aser Bodhbar tashi nung nisung 20 tashi süogo, ta Guru Teg Bahadur hospital nung Medical Superintendent, Sunil Kumar-i metetdaktsü.
Bodhbarnep Lok Nayak Jai Prakash Narayan Hospital nungi tasümang pezü Guru Teg Bahadur Hospital-i bener aru, ta ketdangser kati metetdaktsü.
Bodhbarnep security sepaitemi rara adokba tesemtem nung flag march agi aser nüburtem dang ki telung nungi ayazüka malutsü tuyua liasü.
Ano külen Mongolbar ayaterm nung ken o ka angadangba sülen Delhi High Court-i Delhi Police dang North-East district nung rara adokba mapang yirua alirtem treatment agiba mapang nung parnok nem security agüjang, ta tuyuogo.
Ken o angadangba sülen Division Bench ka nungi Justices- S. Muralidhar aser Anup Jairam Bhambhani nati, yirua alirtem osang aser parnok treatment agiba osang Bodhbar nikongdang tashi nung agüjang, ta tuyu.
Delhi High Court-i, “Iba tetuyuba ya GTB Hospital Medical Superintendent aser LNJP Hospital nem Deputy Commissioner (Crime) aser Deputy Commissioner (North) nati metetdaktsütsüla aser court nung onok rongnung desema alisang Registrar (Listing), Praveen Uppal-i phone ajanga Commissioner of Police nem metetdaktsütsüla,” ta tuyu.
Delhi Chief Minister, Kejriwal-i iba tensa ya kanga mejungi kümogo aser iba atemaji pai Union Home Minister Amit Shah dangi shidi zülur, ta metetdaktsü.
Kejriwal-i twitter ajanga, “Ni yasüng piyong nisung aika den tongtepratepogo. Iba tensa ya kanga majung. Police-i akokba tashi meranga inyakaka tensa mazüokteter aser tamang mekateter,” ta metetdaktsü.
“Army jaoktsüla aser rara adokba tesem ajak nung curfew ozüng benoktsüla. Iba atemaji ni Home Minister dangi shidi zülur,” ta paisa metetdaktsü.
Anogo ana tashi northeast Delhi tesem aika nung long agi ontepba aser injang yokba ajanga nisung aika süogo aser noklang ka dak tema yiruogo. Asürtem rongnung police head constable ka densema lir.