Delhi nung dengue agi ano ana süsemogo

New Delhi, September 17, 2015: Brihostibar nü New Delhi nung aliba sorkar hospital ka nung nüburtemi parnok dak ‘Dengue’ tashitak tendangtsü atema azü tozükdaktsüba noksa nung angur. India yimtiba, Delhi nung tesüiba küm pongu tsüngda Dengue tashitak tang tamajungtiba poktetogo. Tang tashi nung nisung 1,872 dak iba tashitak putetogo, aser tesüiba hopta ishika tsüngda nisung tenet bo iba tashitak agi süogo. 

New Delhi, September 17 (Agencies): Delhi nung ano nisung ana dengue agi süsemogo ta mulung melemi bilemba osang ka ajanga metetdaktsüogo koba ajanga iba shirang agi joko linük yimtiba nung nisung 18 buba taküm lalur asütsü, Ajisüaka tang tashi nung dengue agi asüba official süa metetdaktsübabo nisung pongu dang lir.
Tan asür arishi küm asem ser tesadang, Neha Mathur-er tsüraburtemi la ya dengue agi asü ta ashir aji süaka yimti nung mozü ki anati ashiba agi, iba tetsür tanur dak dengue tendangtsü metuyu.
Mongulbar nüa arishi küm 9, Sabreena Fatima dengue agi shiranga Ram Manohar Lohia Hospital nung asü, ta mozü ki osang ka ajanga metetdaktsü. La ya south Delhi nung aliba Abul Fazal Enclave nungi anir arüba liasü.
Sangam Vihar tesem nung alir, asür Neha tebu, Vinod Mathur-i ashiba agi, par jalaji Madan Mohan Malviya aser Hamdard Majeedia mozü ki temi anir aoba mapang doctor temi la ‘acidity’ atema dang yari aser dengue bo anogo ana nü metendangi alitsü shia liasü.
Aji oda süaka Saket City hospital nungbo la dak dengue puteta liasü anungji la dengue mesen jagisa tepset, ta pai shisem.
“Onoki mezüng la Madan Mohan Malviya Hospital-i anir aoba mapang doctor temi la acidity agi kangshir ta shir mozü kar zülutsür kidangi yok aser Hamdard Hospital nunga kasaji dang ashiba dak alaka dengue tendangtsü atema kecha mashi. Iba sülen onoki la Mongulbar nü Saket City hospital-i anir ao aser yangji dengue tashidak aliba putet. Tashidak putetba sülen la ICU nung ghonda ana shi yur külen nikongdang 2:00 akok nung asü,” ta Vinod-i ashi.
Saket City hospital nung ketdangser kati ashiba agi, la indang azü tendangdang ‘platelet count’ 10,000 dang aliba puteta liasü.