New Delhi, September 21 (Agencies): India yimtiba nung dengue tashidak agi nisung 3,791 dak tangshia lir aser September 19 tashi nung kasa tashidak agi nisung 17 süogo, ta ketdangsertemi Hombar nü official süa metetdaktsüogo.
Municipal Corporations of Delhi (MCD)-i iba tesasatsü osang metetdaktsüba sülen tashidak nokdangtsü atema telemtetba kar agitsü asoshi, Delhi Health Minister Satyendar Jain-i Hombar nü municipal commissioner tem ajak rongdak senden ka jatepa liasü.
Rongdang nüngdak achiteta Delhi nung tang tashi nung dengue tashidak anepalutsü asoshi anepaludak tesem (Clinic) 55 lapoktsüogo.
Iba tashidak agi tang tesüsa asülaji, east Delhi nungi arishi küm 36 tain, tettsür ka lir. La ya nija mozüki ka nung Deobar aongnung iba tashidak agi shiranga asü.
Tang MCD-i metetdaktsüba dengue agi shiranger rongnung 1,119 bo taoba hopta kija nung putetba lir koba mapang nisung 12 tashi kasa tashidak agi asüba jangja liasü, ta ketdangsertem sangdongba osang nung shia lir.
Ajisüaka tang tashi nung dengue agi asür ajak agi nisung 30 jungogo, ta nüburtemibo jembir.
Rizünga aliba osang ajanga ashiba agi, yaküm September ita tashi nung iba kasa tashidak agi nisung 995 dak kongshi aser nisung asem ang asü.
Dengue tashidak agi tangshirtem 2013 küm 5,574. 2012 küm 2,093, 2011 küm 1,131 aser 2010 küm 6,259 liasü.
Delhi sorkar-i Baba Saheb Ambedkar Hospital aser Lok Nayak Jai Prakash Hospital na nung yipten noklang anana aser Madan Mohan Malviya Hospital nung yipten 100 tali amenoktsü tetuyuba agütsüogo.
Union Health Minister J.P. Nadda-i All India Institute of Medical Sciences (AIIMS), Ram Manohar Lohia (RML) Hospital aser Safdarjung Hospital tem dena mozüki kar nung dengue agi shirangertem anepaluba yimya aser tesemtem asadanga liasü.
Pai item mozü kidang superintendent tem dang dengue agi shirangertem indang anogo shi osang agüjang ta tetuyuba agütsüogo.
You must be logged in to post a comment Login