Delhi nung Dengue tashidak agi shiranger 40 shi puteta lir

New Delhi, July 27 (Agencies): Delhi yimti nung nisung 40 shi dengue tashidak agi shirangba osang taoba hopta tatembanglen tashi nung bushitetogo ta South Delhi Municipal Corporation (SDMC) ketdangser kati tanü Hombar nü metetdaktsü.
Tan bushitetba osang ya taoba küm 5 tsüngda nung dengue tashidak agi shiranger timba bushitetba lir ta ketdangserisa ashi.
“Delhi anüdoklentip tsütsü alir 15, Delhi anüdoklen alir 8 aser Delhi anülulentip tsütsü alir 12 densema Delhi nung alir nisung 40 shi tang dengue tashidak agi tonga lir,” ta pai metetdaktsü.
Tan July ita kija nung dengue tashidak agi shiranger nisung 23 tashi putetba ajanga taoba hopta ka tsüngda nung dengue tashidak agi shirangba osang ya noklang nung shilem 38 agi tali akümba kuli angur ta paisa shisem.
January 1 nungi July 25 nü tsüngda nung dengue agi shiranger 16 tashi 2014 küm, 17 tashi 2013 küm, 9 tashi 2012 küm aser 15 tashi 2012 küm bushiteta liasü.
Ajisüaka, 2010 kümbo January 1 nü nungi tenzüka July 25 nü tashi nung nisung 50 dak tema dengue tashidak agi shirangba osang bushitet.
“Dengue tashidak poktetba azüoktsü nükjidong nung Domestic Breeding Checkers (DBCs) 710 tashi tetneta lir aser parnoki nüburtem nem nüngdakba temetettsü osangtsüsang tagütsüdak lir,” ta East Delhi Municipal Corporation (EDMC) nung Medical Health Officer (MHO), K K Chaudhary-i metetdaktsü.
Paisa ashiba agi, mozüki 33 tashi nung dengue putettsü osettsüset peria yua lir.
Dengue tashidak madak takok ngua raratsü atema kechi tashi terenemshiba agia ali ibaji tendangtsü asoshi Union Health Minister, J P Nadda-ia mapang jilia osang memetetdaktsüi mozükitem semdanga senzüba osanga jangjaogo.