Delhi nung Denmark tsür raksatsüba ken o nung nisung pongu aitsüogo

New Delhi, June 06 (Agencies): 2014 küm linük yimtiba, Delhi nung Denmark tsür ka apuba sülen la dang nungi ayuba den tashiyim amshia raksatsüba ken o nung New Delhi nung aliba court kati nisung pongu aitsüogo.

Ano tai tonglokja alir nisung asembo arishi küm 18 tekübok lir, aser India nungbo parnokji tanur ta züngshir asünungji parnok anema ken o jibo juvenile court nungang akatsü.

Kasa ken o nungsa tai tonglokja alir arishi küm 56 tambur kabo taküm February ita nung süogo.

2014 küm January 14 aonung arishi küm 52 tain Denmark tsür raliwalir kaji tebur telok kati tashiyim amshia raksaja liasü.

Iba ken o nung aitsür tebur ponguji arishi küm 27 Mahendra alias Ganja, Mohd Raja (23), Raju (24), Arjun (22) aser Raju Chakka (23) nunger lir.

Additional Sessions Judge, Ramesh Kumar-i Indian Penal Code kübok sections 376 (D) teloki tashiyim amshia raksatsüba, section 395- hadir amer auyaba, section 366- nisung apuba, section 342- tashiyim amshia sota ayuba, section 506- ozüng alema ambangyima inyakba aser section 34- nükjidong kasa yur inyakba ken o tem nung parnok ajak aitsü.

Iba aonungji aibelenertem jagi tetsürlaji New Delhi Railway Station anasa aliba Divisional Railway Officers’ Club tesem tezülen kati anir oa tashiyim amshia la raksatsü.

Aibelener pongu jagibo parnoki aibelena mali, ajisüaka iba tatalokba matongdang anogo ka lia parnoki teküp ayoker ka den shi nung medem ta ashi.

Parnok nem temerenshi obendang agütsütsü atema anogoji June 9 nü lateta yuogo.

Ano arishi küm 18 tekübok tebur asemji Juvenile Justice Board matsüngdangi anir maodang par asem anema bushisüngdang ka tang tagitak lir.