Delhi nung electric ajanga jajaba bus gari amshidaktsütsü

New Delhi, March 10 (Agencies): Delhi Transport Minister Gopal Rai-i yimti nung electric agi jajaba bus gari tanü Brihostibarnü lapoktsüogo.
“India nungbo electric tashi ajanga jajaba bus gari jajabaji tan mezüng lir aser iba gari yagi noklang nung noklang mopung menena mekümdaktsür. Iba inyakyim ya tan mezüngbuba lir. Item bus tem ya Delhi nung ita trok tendangtsü,” ta Delhi Transport Minister Gopal Rai-isa osang benertem dang ashi.
Item bus gari tem yagi anogo shia Delhi Secretariat nungi Central Secretariat tashi anogo nung ter ben oli aruli jajatsü.
“Ita trok tendangba sülen tajangzük lira ano bus talila jajadaktsüsemtsü onok tebilemba lir,” ta Gopal Rai-i item bus jaja tenzüktsüba sentong nung ashi.
Linük nung jajatsü aliba item bus 100 ya China nung aliba gari yangluba company kati yanglu aser iba mapa ya Delhi Dialogue Commission (DDC) nung vice chairperson Ashish Khetan-i yaküm China semdangba sülen DDC benzükba maparen lir.
“Item bus gari tem atema Delhi sorkari sen naya ka danga magütsü. Iba bus gari ‘full charge’ asütsü asoshi gondha pezü agir aser khen charge asüba jagi kilometre 280 jajateter,” ta Khetan-i ashi.
“Delhi sorkari item gari anentsü aser charge asütsü atema Millennium Depot nung tesem lateta yutsüogo. DTC bus nung inyaker driver ka ka aser conductor ka ka item bus atema agütsüogo,” ta Rai-i shisem.