Delhi nung FIFA U-17 World Cup asayatsü: Javier

Kolkata, February 23 (Agencies): India yimtiba, Delhi nung tzü-mopung mejungi menenba ajanga taküm küm October ita FIFA Under-17 World Cup asayatsü aliba tesem balakai bener aotsü südi, ta osang sangdonga aliba, Local Organising Committee nung Tournament Director, Javier Ceppi-i jangjashitsüogo.
Delhi nung tzü-mopung menenba tebilemtsü ya kanga tulu kümogo. Taoba küm ‘National championship’ cricket asaya ana India yimtiba nung asayatsü liasü, saka mopung majungba ajanga iba asaya tesem balaka nung asayadaktsü.
Taküm Diwali October 19 nung amungtsü aser iba sülen FIFA U-17 World Cup India nung asayatsü sentong renema lir.
“Mopung menenba nungi kümzüktsü asoshi onoki sentong balala bushidangtsü, saka Delhi nung iba asayamung masayatsübo ano mejenbi,” ta Javier-i iba asayadak moapu semdangba mapang osangbener dang ashi.
Iba asayamung nung telok 24-i shilem agitsü aser asaya 52 asayatsü lir. Item asayatem ya New Delhi, Navi Mumbai, Margao, Kochi, Guwahati aser Kolkata nung asayatsü.