Delhi nung gari ozüng tesashi benoker

New Delhi, Dec. 04 (Agencies): Mopung menenba nokdangtsü nükjidong nung Hokolbar nü Delhi sorkari gari ‘odd/even number formula’ benokogo; Iba tetezü nija garitem ita ka nung anogo 15 dang senzütsü melatsü.
2016 Janunary mezüng anogo nungi benshitsü atema Delhi sorkari benokba ozüng tasenbaji, odd number (züngdangba 1,3,5,7,9) plate aliba garitem aser even number (züngdangba 0,2,4,6,8) plate aliba garitem anogo lemsar senzütsü.
India nung iba ama mapatong benokba yimti mezüngbubaji Delhi asütsü aser Asia nung China yimtiba, Beijing sülenbo Delhi tanabuba asütsü.
India nung mopung tamajungtibaji Delhi nung lir, aser iba tensaji tzüsü aser mokozü meyoktepba ajanga asükwa mapang tamajungba akümer. Tawa Delhi High Court-i, Delhi nung tang mopung menenba tensa ya taoksatsüka lir aser iba ya ‘gas takdang’ ka nung aliba den kasa ta reprangteta Centre aser Delhi sorkar dang mopung menenba anema raratsü atema teinyaktsü kar inyakang ta tuyua liasü.
Justice, Badar Durrez aser Sanjeev Sachdeva nati akumba bench ajanga, Environment Ministry aser Delhi sorkar nati benokba sentongji mabensa, kechiyong iba nungji teinyaktsü tejangja mali aser itemji inyaktsü atema mapang lateta mali.
Court-isa Delhi sorkar dang, National Green Tribunal-i tuyuba ama nüburtemi jana rüja moapu nung marongtsü atema inyakang ta tuyuba den külemi yimti ketdangsertem dang iba osangji media ajanga sangdongang ta metetdaktsüogo.
Delhi nung traffic temzüng & temetettsü kar:
* Delhi nung 2016 Jan. 1 nungi anogo balala nung odd aser even number garitem senzütsü. Iba telemtetba nung Compressed Natural Gas (CNG) bus tem, taxi aser auto-rickshaw bo madener.
* Delhi nung gari lakh 27 shi lir, koba ajanga anogoshia gari junga mesenzüteter.
* Anogoshia Delhi lenmangtem nung gari tasen 1,500 shi bendenloksemer.
* Mokozü tali adokba garitem indang report agütsütsü atema Delhi sorkari web-based app ka tenzüktsü.
* Delhi indang mopung quality index ji 331. Air quality index 301 nungi 400 tsüngda ajanga tango sashiba nung timtem adokdaktsür.