Delhi nung India-Bangladesh border forces senden amen

New Delhi, Rongjui/September 03 (Agencies): India aser Bangladesh naprongla nungi arrtsü anüker sepaitem senden ka tanü New Delhi nung tenzükogo aser iba senden nung telok anaiti telungpur teloktem aser Rohingya nunger refugees onüktem densema jembitsüa akok, ta BSF ketdangser kati metetdaktsü.
BSF otongdar kati, “47buba border co-ordination conference, Border Security Force aser Border Guard Bangladesh tsüngda DG-level senden tanü tenzükogo,” ta metetdaktsü.
Yashi pai, iba senden nung India-i Bangladesh nunger nisung tamajungertemi BSF sepaiatem amakaba aser arrtsü adena ozüng alema shishilembaba onüka jembitsü, ta metetdakja liasü.
Kasa senden nung linük ana nungi sepaiatemi peipei linük nung Ronghingya refugees senzüba tebilemtsü süoka jembitsüa akok.
Border Guard Bangladesh (BGB) Director General (DG) Maj Gen Md Shafeenul Islam leniba nung züngsem 13 yashi India tonga aruogo aser parnoki anogo troknü India semdangba mapang nung India nunger sepai- BSF den senden amentsü.
Ano India tsütsü nungi DG K K Sharma leniba nung Border Security Force BSF) züngsemtemi senden nung shilem agir.
Küm shia India aser Bangladesh sepaiatem tsüngda senden anaben amener.
Iba senden nung BSF-i Bangladesh nunger nisung tamajungertemi BSF sepaitem amakba, arrtsülen ozüng alema inyakba mapatem, India nung telungpur teloktem densema onük aika süoka jembitsü, ta otongdarisa metetdaktsü.
Kasa senden nung Dhaka nung aliba BGB-ia Bangladesh nungi temesepba mozü aika shibelenba mesüra BSF-i Bangladesh sensotem apuba onük süoka jembitsü, ta paisa metetdaktsü.
Linük ana sepaitem tsüngda senden tembangba sülen Rongjui/September 7 nü linük ana sepaitem tsüngda tezüngzüktep agitsü, aser tasüngnü BGB züngsemtem par linüki meyipa aotsü.
Linük ana tsüngda DG-level senden ya 1975 küm tenzüka liasü, aser taküm Rongchii/April ita nunga Bangladesh yimtiba, Dhaka nung iba senden menogo.