Delhi nung ki ka chirepba lendong nung tetsür ka den tanur 4 asü

New Delhi, Rongjui/September 26 (Agencies): Tanep Delhi kübok Ashok Vihar tesem nung asemben amentepa yangluba ki ka chirepba lendong nung tanur pezü den tetsür ka densema süogo; ano nisung karbo nembanga alitsü südi ta bilemer, ta ketdangsertem osang ka ajanga metetdaktsü.
Osang angazükba agi, iba lendong nungi nisung 8 bo kümzükogo, aser parnok rongnung nisung asembo kanga mejungi lir. Yirua alirtemji Deep Chand Bandhu Hospital-i anir oa yaridar. Asürtem rongnung tanur anabo adianu liasü, ano tebur chanu ka den lar aianu arishi küm 5 tekübok tetsür chanu ka liasü.
Ki chirepba jana jagi ano nisung aika nembanga alitsü südi ta bilema kümzükba maparen maneni inyakdar, ta police-i metetdaktsü.
Iba lendong ya tanep 9:25 ako meta atalokba sülen mi ensepba gari trok iba tesem jagi yoka liasü, ta police ketdangser kati metetdaktsü.
North Delhi Municipal Corporation nung ketdangser kati ashiba agi, iba kiji küm 20 tejaklen yanglu aser kiji mejungi liasü.