Delhi nung Lok Sabha election atema AAP-i candidates trok sangdong

New Delhi, Metsüremi/March 02 (Agencies): Tanü Aam Aadmi Party (AAP)-i Delhi nung taruba Lok Sabha election 2019 atema menden tenet nungi menden trok atema party candidate tem tenüng sangdongogo.
Delhi nung AAP-i Congress party den lokteptsüa akok ta aikati bilema liasü, ajisüaka tanü parnoki candidates sangdongba ajanga item osangji tai liasü ta jangjar.
AAP tongti aser Delhi Chief Minister, Arvind Kejriwal-i, kobi melii tanüngba menden ka atema party candidate tenüngji sangdongtsü, ta metetdaktsü.
Pai twitter ajanga, “Tenüngsang agutsür aser tajungtiba atema bilemtsür. Kobi melii candidate 7buba tenüng sangdongtsü. Tangbo Delhi nung alirtemi state jenjang angutsü,” ta metetdaktsü.
Tanü sangdongba candidates trokji tamalen Parliamentary constituency balala nung party in-charges liasü.
New Delhi nung osangbenertem den jembidang Delhi AAP convener, Gopal Rai-i, Atishi-i East Delhi menden nungi tokteptsü, Guggan Singh-i northwest Delhi menden nung, Raghav Chadha-i south Delhi, Dilip Pandey-i northeast Delhi, Pankaj Gupta-i Chandni Chowk aser Brijesh Goyal-i New Delhi menden nungi tokteptsü, ta metetdaktsü.
Rai-isa, kobi melii West Delhi atema candidate tenüng sangdongtsü, ta metetdaktsü.
Taoba ita NCP tongti, Sharad Pawar’er kidang opposition party tem senden amenba mapang nung Congress party Tir, Rahul Gandhi-i par party aser AAP na lokteptsü memelung; Delhi unit Congress lenir kari memelungba ajanga Rahul-i AAP den lokteptsü memelung, ta Rai-isa metetdaktsü.