Delhi nung Madame Tussauds Wax statue museum lapoktsü

London, November 13 (Agencies): Alima ajunga nung shimo agi nisung kürakyanglutem yanglua ayudak, Madame Tussauds India kübok New Delhi nunga 2017 küm tentettsü renemba osang ka metetdaktsüogo.
Britain kübok London yimti nung tentetba Madame Tussauds nung Amitabh Bachchan aser Katrina Kaif na densema Bollywood nung nüngtutu nisungtem indang kürakyanglutema yanglua lir.
Britain nung ‘Festival of India’ sentong 2017 küm ayonga agitsü renemba osang sangoktsüba den külemi, 2017 Cultural Exchange mapatong den sentaktepba Shakespeare’s First Folio densema, British Museum nung ayuba senti osettem aser Britain nüburtem nem yimtenren temeten agütsüba tezüngzüktep, Magna Carta India tesem balala nung sayua senzüdaktsütsü sentong renemba osang ka Britain Ato Kilonser, David Cameron-ia tanü Hokolbar nü metetdaktsüogo.
“Rongsenren jenjang nungi tenzüka kenten menü shilem tashi densema Britain aser India na tsüngda tesendaktep tajung lir. Ano, alima tesem balala nungi bendenba sobaliba osettsüset Britain nung bendena lir,” ta pai ashi.
India Britain yimsüsütsü talenba nungi nüchiso ngur küm 70 ajungba nüngtem nung linük anati külemi lungjemer 2017 küm sentong balala agitsü asoshi tan renemer lir.
Madame Tussauds nung tongti telok, Merlin-ia taruba küm 10 tsüngda nung pound sen million 50 shi amshia, India kübok yimti balala nung Sea Life aquariums aser Legoland Discovery Centres densema raliwalirtem puatsü tesem ishika tentettsü sentong renemogo.