Delhi nung maneni odd-even scheme benoktsü

New Delhi, February 10 (Agencies): Linük yimtiba, Delhi nung mopung menenba ajema akumtsü aser ‘traffic’ tebilemtsü koktettsü nükjidong nung taküm küm tetenzüklen ‘odd-even’ scheme benoka liasü aser iba scheme ya ano maneni benoktsü, aser item anogoji asüng Brihostibarnü Delhi Chief Minister, Arvind Kejriwal-i sangdongtsü.

Tanü state Transport Minister, Gopal Rai-i, lenmang balala ajanga nisung lakh 11 dang nungi telangzüba anguba shisadangba sülen asüng sorkari sangdong ka agütsütsü, ta metetdaktsü.

Deputy Chief Minister, Manish Sisodia-ia gari licence plate inyakyim ano tanaben benoktsü, ta metetdaktsüogo.

Tanga osang ka ajanga ashiba agi, CBSE Board examination tembangba sülen April ita nung odd-even scheme benoktsü.

“Iba scheme tanaben benoktsü. Asüng osangbenertem senden ka nung Chief Minister densema minister temi anogotemji sangdongtsü,” ta kasa osang ajanga ashi.

Tanep transport minister, Rai-i twitter ajanga, “Odd-even scheme atema asüng Delhi sorkari telemtetba ka agitsü, nüburtem dang nungi anguba telangzüba tanü renemdar,” ta metetdakja liasü.

Odd-even scheme ya Delhi nung taküm January 1 nungi 15 nü tashi benoka liasü, aser item anogotem nung odd number plate aliba garitem aser even number plate aliba garitem anogo lemsar senzü, saka Deobarnübo gari ajak senzütsü melaa liasü.

Iba sülen sorkari nüburtem dang nungi emails, missed call, online form ajanga telangzüba meshiba den külemi interactive voice response system ajanga nisung lakh 9 den tongtepratepa liasü.

“Online form ajanga telangzüba 28,300 angu, email ajanga telangzüba 9,000 aser missed calls ajanga telangzüba 1,82,808 angu. Nüburtem taginüba metettsü atema sorkari phone call 9,00,000 ajanga tongtepratep,” ta sorkar kedangser kati ashi.