Delhi nung Manipur tensa reprangshiba senden ka amen

New Delhi, January 15 (Agencies): Tanü New Delhi nung Centre nung tongti minister tem aser sepai tongti ketdangsertem senden ka mena tang Manipur tensa indang asadanga o lemtepogo.
Yaküm November 1 nungi tenzüka United Naga Council-i Manipur rongsenkettsüng lenmang mokdanger anogo 75 jungogo, koba ajanga state nüburtemi timtem jenti ajangshidar.
Tanü iba senden nung Union Home Minister, Rajnath Singh, Defence Minister Manohar Parrikar, Union Finance Minister Arun Jaitley, Army Chief, General Bipin Rawat, Home Secretary, Rajiv Mehrishi aser tongti ketdangser kar dena liasü.
Kasa senden nung Attorney General, Mukul Rohatgi0-a dena liasü, koba ajanga Centre sorkari ozüng amshia mera kar agitsüa akok ta imlar.
Senden nung parnoki Manipur-i aoba lenmang National Highway 2 mokdanga aliba lapoktsü aser tensa süngjema akümtsü atema o lemtepogo, ta ketdangsertemi metetdaktsü.
NH-2 ya ajanga Nagaland adena Assam aser Manipur na sentakateper, asr iba lenmang lapoktsüji Centre atema tongtibang onük ka kümogo. NH-37 bo lapokogo, aser Centre-i NH-2 jia tekaraba nung lapokner, ta kasa osang ajanga ashi.
State nung March 4 aser 8 nü assembly election agitsü aser iba atemaji Central sepai 20,000 shi lemzüktsüogo.