Delhi nung Manipur tsür dang ‘corona’ ta jaa metsü metsüloktsü

Guwahati, March 23 (Agencies): Deobar aonung Delhi nung tebur kati Manipur tsür ka dak tim masüba yimya benshi.
Idangji arishi küm 25 tain tetsür jagi tebursang noktang saka tebur jagi meyiper la dak metsü metsüloktsü aser ‘Corona’ ta jar two-wheeler nung jena ao.
Iba ya North-West Delhi kübok Mukherjee Nagar nung atalok.
Iba dak sendakba nung FIR ka benokogo aser tai tongloktsüsang indang maitsü jangjatsü meranger, ta DCP (northwest) Vijayanta Arya-i ashi.
Tetsürlai ashiba nung ajemdaker Mukherjee Nagar police station nung ken o ji benok aser police-i iba temeket nung aliba CCTV camera ajak repranga odar.
“Ni tammang tesem ka süidang arishi küm 50 shi tambur kati kü dang o tamajung ashi. Idangji ni pa den toktep saka pai kü dak metsü metsüloktsü aser Corona ta jar jena ao” ta tetsürlai ken o benokba nung shia lir.
Hombarnü Delhi chief minister Arvind Kejriwal-i Delhi police dang aibelener nem tapet temerenshitsü agütsütsü atema shiogo.
Tetsür ka la indang T-shirt nung sali metsü agi sünger agiba noksa ka social media nung kanga prokshidar.
“Ni iba osang angashidang kanga aoksar. Delhi Police-i aibelensang aputsüla aser ozüng tapet agi merenshitsüla. Covid-19 anema raraba mapang asenok linük ka ama longjemer noktakdi” ta Kejriwal-i Twitter nung metetdaktsü.