Delhi nung mapa tajung inyakba menokdangtsüla: Kejriwal

New Delhi, June 15 (Agencies): BJP aser Congress aija Bodhbarnü Delhi Chief Minister, Arvind Kejriwal-i Parliamenttary secretary tem shimba onük nung Ato kilonser, Narendra Modi aitsüogo.

Osangbenertem den jembidang AAP tongti lenir, Kejriwal-i, “Ni teka amteper Modi dang mepishir. Nü raraji kü den lir. Nai melungra kü dak zükang, ajisüaka Delhi nübur nem timtem tagütsü,” ta ashi.

“Delhi nung mapa tajung inyakba nokdangtsü memerangtsüla,” ta paisa ashi.

Aam Aadmi Party (AAP) leniri ashiba agi, Delhi sorkari AAP MLA 21 Parliamentary Secretary tem shimbaji parnok atema tenük, tenarong aser tekatem dang lir.

“Parnok teyari ajanga dang ozü sorkar junga inyakteter. Onoki terenlok mapa inyakba nung item Parliamentary Secretary temi telung nung kanga meranga inyaker,” ta Delhi Chief minister-isa ashi.

“Ozü sorkari Parliamentary secretary tem shimba atema kechiba Bharatiya Janata Party (BJP) aser Congress-i sorkar dang tasüngdangba akar, kechiyong parnokia Delhi yimsüsüdang yamajisa inyakogo,” ta pai ashi.

Taoba mapang chief minister tem tenüng tetshia Kejriwal-i, BJP lenir, Sahib Singh Verma-i 1997 küm MLA ka, Nand Kishore Garg Parliamentary Secretary shim, ta ashi.

“BJP-i inyakbabo kecha masü, saka kodang AAP-i inyakdir ibajibo temzüng nung aliba ama masü,” ta pai ashi.

Kejriwal-isa taoba Delhi chief minister, Sheila Dixit-ia tang Delhi nung Congress Tir, Ajay Maken Parliamentary Secretary shima liasü, ta ashi.

Kejriwal-i ashiba agi, 2015 küm February 2015 ita nung sorkar tashii aruba sülen pai doctor aser engineer densema aliba par MLA kar dang Parliamentary Secretary inyaktsü atema asüngdangtsü lemteta liasü.

Item Parliamentary Secretary mapa tali inyakba atema parnok nem sen magütsür, ta paisa ashiba sülen pai osangbenertem senden toktsür ao.