Delhi nung mezüngbuba ‘Power Consumer Compensation Policy’ tenzüker

New Delhi, Rongchii (April) 17 (Agencies): Delhi nung Discoms (Distribution Companies)-i power magütsüba atema consumer nem ghonda shia sen 50 meyipa agütsütsü atema tebilemba ka Delhi Chief Minister Arvind Kejriwal-i mulunga agizükogo.
Discoms-i khuret bena mapa inyaktsü atema iba mapa ya inyaktsü ta Delhi sorkari metetdaktsü.
Distribution company jagi consumer nem senji agütsütsü aser ibaji electricity bill nung katiteptsü. Ajisüaka, iba iba tebilembaji Lieutenant Governor Anil Baijal dangi benogo aser pai mulung nungang mapa küma tenzüktsü.
India nung ‘Power Consumer Compensation Policy’ mezüng tenzükbaji linük yimtiba nung asütsü.
Iba inyakyim ajanga power company temi ghonda tsüngda electricity agütsütsüla aser yamaji meinyakra parnoki mezüng ghonda ana atema ghonda shia sen 50 consumer nem agütsütsü aser ghonda ana sülen ghonda ka atema sen 100 agütsütsü.
Tesem ka nung alirtem ajaki mesüaka consumer kati power manguba timtem ajurura, pa/lai SMS, email, phone mesüra online ajanga “No Current” osang agütsütsü akok. Iba sülen Discom jagi iba atema mapa inyaktsü aser power yokba indang anogo aser mapang indang confirmation message ka consumer dangi yoktsü.