Delhi nung mokokachi

India ya litsü Sq. kilometer million 33 shi lir aser nütsüng billion 1.277 shi aliba linük ka lir. Iba linük ya loktiliba, tamangba yimsü, sobaliba aser oshioben jenti aliba linük ka süaka ‘ajak külemi longjema litetba linük ka’ ta India nungeri nümatanga jembir, ajisüaka India tesem balala nung talisa, linük yimtiba Delhi nung mapang shia northeast state tem nungi aruba nisungtem anema mokokachiba aser anema inyakba osang balala angashidang ‘Atangji, iba linük ya ajak longjema litetba linük’ ta agizüktsüji nungnanger. Tawa Delhi police osang ajanga, küm ana tsüngda Delhi nung alir NE nisungtem anema inyakba shilem 232.58 agi timba kümogo ta ashiba osang ya taoksatsüka lir. Kasa osang ajanga, 2013 küm Delhi nung NE pur anema inyakba ken o 89 liasü, 2014 küm 280 aser 2015 küm ken o 296 benoka liasü. 2015 küm benokba ken otem rongnung NE nisung tepsetba ken o ti aser tepsettsü merangba ken o ana densema lir. India nungeri nümatanga jembiba ama, atangji India linük ya tamangba lokti, sobaliba aser oshioben balala jembir ajak longjema litetba linük ta alimai agizüktettsü asoshi linük yimtiba New Delhi ya tatishitsü tajung sayutetba yimti ka asütsüla. India linük ya ajak atema, iba nungji NE nisungtema densema lir, ajisüaka tema tereprangtsü- sorobangro nung ajemdaker Delhi nung alirtemi NE nisungtem dang ‘chinkis’, ‘momos’, ‘chowmins’, ‘Nepali’, ‘Chinese’ ta ajaba angashidang NE nisungtem temulung yirur aser tezü atanger. Delhi, Punjab aser Punjab lisopurtem danga ‘Pakistanis’ ta aja nunga parnoki-a koma ka bilemtsü (?), ta shisadanger. Taoba mapang Arunachal nungi Delhi Police Joint Commissioner, Robin Hibu-i, Delhi aser linük tesem balala nung NE nisung ajaki momokachi ajurur, “Delhi aser linük tesem ajaklen NE nisungtem den tesentaktep malir. Au, kü danga jashitsüsa o tamajung ashiba ajangshiogo,” ta ashi. Yaküm The Washington Post-i survey map ka sayaba nung, pei tuluba/temaba ta shisanga tangar bendanga mokokachiba linük tamajungtibaji India lir ta sayuogo. Akhidang Africa nunger reshikangshia mokokachibaji, parnok sentsü kanga tanak asüba ajanga liasü, ajioda India nunga NE nisungtem tereprangtsü nung teni tapak aser tenük tila nung ajemdaker India mainland nung alirtemi bendangshidanga mokokachir. India mainland nung alirtem tereprangtsü ya ‘Aryan’ mesüra ‘Dravidian’ lir aser NE nisungtem tereprangtsü ya ‘Mongoliod’, ibayongji tereprangtsüji khenyongi balala. 2014 küm January ita Delhi nung Arunachal Pradesh nungi kaketshir, Nido Tania tepsetba sülen NE nisungtem anema inyakba nokdangtsü atema mera agitsü asoshi Bezbaruah committee tenteta liasü. Parnoki benokba onüktem rongnung- India mainland nung alirtemi NE sobaliba meteta akümtsü asoshi teacher training institutes nung NE sobaliba balala syllabus nung densemtsü aser school tem nung North East indang project densemtsü, Delhi High Court-i ozüng tasen benoktsü mesüra Indian Penal Code yanglushitsü aser NE nisungtem anema inyakba ken otem tekaraba nung katettsü asoshi Fast-track courts tentettsü benokogo. Ano taoba hopta nunga Delhi Police Commissioner, B S Bassi menden ser NE nisungtemi timtem balala ajangshiba onük nung senden ka amendang Delhi Police-i NE state tem nungi tetsürtem ‘Crime Victim counsellors’ ama anioktsü telemtetba agiogo. Küm aika tejaklen Linük Temzüng yanglurtemi India linük junga yangertettsü nükjidong nung nükenbelem arema linük Temzüng yangluogo, ajisüaka tanü linük nung mokokchitepba ajanga ibaji maksütsür.  Anungji, alima dang India nung kin-kidong aser tamangba yimsü temeyoktep ajak külemi longjema yimjung nung liteter ta atangji nung sayutettsü atema sorkar aser ozüng amertemi mapa shisang-shisanga inyaktsü mapang tongogo.