Delhi nung motorbike auyar Manipur nunger ka apu

Imphal, February 18 (Agencies): Manipur nunger arishi küm 33 tain Zacky Rex-i Delhi nung jenjang aika alangba motorbike tem auyaba atema puogo.
Zacky Rex-i Royal Enfield aser tanga jenjang tasak motorbike tem dak tenük yoka auya. Pai packers & movers services ajanga Delhi nungi Manipur-i motorcycles yok, ta police-i ashi.
Lajpat Nagar nung alir Bhagat Singh ta ser nisung kati February 5 nü police tsüngdang ken o ka benok. Iba nung anepdang 6:00 ako meta par ki jakdang mejangja nisung anati pa indang bullet motorcycle auyatsü merang ta shia liasü.
Pa indang motorcycle auyatsü merangba angudang pai asaten aser idangji nisung ana rongnung ka apu, saka kati bike ji bener jena ao, ta police-i ashi.
“Police-i asüngdangya asüdang, Rex-i pa den alisang indang maitsü jungka adoka ashi. Iba nisungji Kangabam Sanatomba aser motorbike auyaba telok nung tanishisang lir ta Rex-i ashi. Parnoki bullet motorcycles auya kechiyong iba bike indang jenjang tasak lir” ta Deputy Commissioner of Police (Southeast) R P Meena-i ashi.
Iba telok yagi Delhi aser NCR nung anena aliba motorcycles tem auya. Parnoki ita shia Manipur nungi Delhi-i aru aser motorcycles 10-15 auyaba sülen Manipur-i meyipa ao, ta DCP-isa ashi.
Iba auer telok yagi packers and movers balala ajanga Manipur-i motorcycles bener yok. Tai tonglokja alisang ket nungi bullet motorcycles 7 aser lock breaking equipment ngutetogo, ta DCP R P Meena-isa metetdaktsü.