Delhi nung Naga lanur 2 züka merenshi

Guwahati, August 12 (Agencies): Delhi nung Northeast nunger dak tenük yoka mapa tamajung inyakba ka ano atalokogo aser ibaji nisung telok kati Nagaland nungi lanur ana züka merenshiba lir.
Osang ajanga ashiba agi Nagaland nungi lanur anaji Hauzkhas village nung aliba Aurum restaurant nung mapa inyaker aser Deobar aonung tena mapa nungi kidangi meyipa aodang len tom nung nisung telok kati azük.
Delhi nung Naga kaketshir tanishir kati ashiba agi nisung telok ka yimdong nung liasü aser parnoki tena dang o tamajung shia merenshi.
Idangji Naga lanur ana jagi timtem ajurutsü ta angateta idak nung jagi jena aotsü merang saka nisung troki tena arshia menep aser süng agi kanga mejungi züka merenshi, ta kaketshir tanishirisa ashi.
Iba mapang nisung ka dakbo beer bottle tejaksa kati anaben tashi yirutsü. Nisung telok jagi Naga lanur ana aser tena medemertem dang parnok anema FIR mebenoktsü amokmeren.
Nisung telok jagisa parnok anema FIR benokra lendong tulu ajurutsü ta amokmeren. Ajisüaka, Delhi police-i iba dak sendakba nung nisung asem puogo.
Naga Students’ Union, Delhi-i iba tatalokba nung aibelenertem merenshitsü atema takhangba agütsüogo.
“Delhi nung tai maketba Northeast nunger dak tenük yoka mapa tamajung inyakba atema onok shisabulur. Iba ya tang mezüng ataloker masü” ta Naga kaketshir tanishir kati ashi.
“Ketdangsertemi Delhi nung aliba Nagaland nungi arurtem kümzüka ayutsü atema mapa inyaktsüla” ta paisa shisem.

You must be logged in to post a comment Login