Delhi nung NE kaketshirtem atema hostel tasen 3 yanglutsütsü

New Delhi, October 20 (Agencies): Delhi nung Northeast state tem nungi kaketshirtem atema hostel tasen asem yanglutsütsü, aser hostel kabo Jawaharlal Nehru University (JNU) nung azüngertem asoshi dang asütsü.

Hombar nü JNU Campus semdangba mapang Union Minister, Jitendra Singh-i, University nung hostel tasenji 2017 küm tashi nungbo renemtsü aser Union Ministry of Development of North Eastern Region (DoNER)-i Northeast kaketshirtem atema benokba hostel asem rongnung iba ya ka asütsü, ta ashi.

JNU hostel kobi melii yanglu tenzüktsü, aser ano Ramanujan College Delhi University campus aser Hindu College nunga hostel ka ka yanglutsü akok, ta pai ashi.

Ajisüaka paisa, tawa Delhi University Vice-Chancellor dang, Ramanujan College mesüra Hindu College ama nung hostel balala yangluba dang nungibo ajak ajangzüktsüsa tesem ka nung dang hostel complex tuluka yangluba tajungba asütsü ta temepishiba ka benokogo, ta ashi.

DoNER minister-i ashiba agi, Apollo Hospital anasa Jasola nung tang aliba Northeast Working Women’s Hostel-a jenjang tajungba kümtsüogo.

Singh-i, “JNU nung Northeast nungi kaketshir aika lir aser yangi azünger kaketshir tanga state tem dang nungibo Northeast state shia nungi timba lir,” ta ashi.