Delhi nung NE nisungtem anema inyakba shilem 200 renlokogo

New Delhi, January 17 (Agencies): Linük yimtiba Delhi nung aliba North-East nisungtem anema mapa inyakba shilem küm ana tsüngda 232.58 shi timba kümogo.
2013 küm Delhi nung Northeast state nungi nüburtem anema inyak dak sentakba nung benokba FIR 89 liasü, 2014 küm FIR 280 benoka liasü aser 2015 küm FIR 296 benoka liasü, ta police osang ajanga ashi.
Item ken o timbaka south Delhi nung benoka liasü, kong NE nüburtem timba ka alir. Ibaji talisa Vasant Vihar Police Station kübok liasü, tanabuba nung south-east aser tasembuba nung north-west Delhi liasü, ta tongti police ketdangser kati ashi.
2015 küm benokba ken otem rongnung nisung tepsetba ken o ti, nisung tepsettsü merangba ken o ana, tashiyim amshia raksatsüba ken o 14, tetsür dak tim mesüi benshiba ken o 16 aser o tamajung ashiba den anitaka aruba ken o 21 liasü.
Taoba hopta Delhi Police Commissioner, B S Bassi leniba nung Northeast tesem nungi nüburtemi timtem balala ajangshiba onük nung senden ka mena liasü.
Delhi Police-i north-east state tem nungi tetsürtem “Crime Victim counsellors” ama anioktsü telemtetba agiogo. “Iba atemaji Bodhbarnü Delhi police-i National Commission for Women (NCW) aser Tata Institute of Social Sciences (TISS), Mumbai den Memorandum of Understanding (MOU) tezüngzüktep agiogo,” ta police ketdangser kati ashi. Tamasabo counselor 23 shimtsü aser ibaji merit nung ajemdaker shimtsü, ta paisa ashi.
NCW ajanga takoksa ajurur tetsürtem/tanurtem atema Delhi police, counselor bench asoshi senotsü agütsür aser TISS-i councellor tasenpurtemji shimtsü, ta paisa shisem.

You must be logged in to post a comment Login