Delhi nung nisung 11 asü

New Delhi, February 25 (Agencies): Northeast Delhi kübok tesem aika nung mepetmesü adoka raratepba nung nisung 11 tashi süogo.
Tanü nisung aika yirur mozü kidang anir ao aser tasüba osangji tanü nikongtsütsü GTB Hospital ketdangsertemi ashi.
Taoba anogo ana tashi Northeast Delhi kübok Chand Bagh nung tensa kanga majung lir aser tanü Delhi Police-i iba tesem nung lungkak aitertem dak tenük amdaktsüba mozü amshi.
Iba tesem nung CAA atema lungkak aitdang nisung 10 tashi süogo, ta GTB Hospital ketdangsertemi metetdaktsü.
Tanü nisung pezü tasü bener aru aser nisung 35 tashi yirur anir aru, ta parnokisa ashi.
Delhi Chief Minister Arvind Kejriwal aser Deputy Chief Minister Manish Sisodia nati tanü anüngdang mozü kidang yirur alirtem semdang.
Ano, Maujpur tesem nunga lungkak aitertemi nija kiojentem raksatsür aser mi senoktsür. Iba tesem nung lungkak aitertemi journalist tem dak teka sangshi aser parnoki agiba noksa aser video tem endokdaktsü.
Taoba Chief Information Commissioner Wajahat Habibullah-i iba dak sendakba nung FIR ana benoka lir aser iba ya asüng Supreme Court nung angadangtsü.
Külen, Delhi High Court-ia SIT ajanga bushisüngdang asütsü aser Centre dang Army mapa lemzüktsütsü petition benoka aliba angadangtsü.
Bodbarnü SC-isa Shaheen Bagh nung CAA anema lungkak aitertem anientsü indang petition balala ana angadangtsü lir.
Maujpur tesem nung telok ana tsüngda raraba manener aser tanü-a telok anaprongi süng aser yin amer lenmang mokdanga liasü.
Tanü sepaitemi telok anaprong senshidaktsütsü merang saka parnoki meyiper lung agi ona raratep.
Hombarnü iba tesem nung CAA anemertem aser pusemer teloktemi lungkak aitdang mepetmesü adoka raratep aser iba mapang police head constable ka dena nisung 7 asü.
Delhi Police-i ashiba agi “Jaffrabad, Maujpur, Chandbagh, Khureji Khas aser Bhajanpura tesemtem nung raradang police 48 aser civilian 98 yiru.”