Delhi nung Odd-Even Scheme tanaben tenzüktsü: Kejriwal

New Delhi, September 13 (Agencies): Delhi nung mopung kanga menenba anema November 4 nungi November 15 tashi yimti nung odd-even road rationing scheme tenzüktsü, ta Hokolbarnü AAP tongti aser Chief Minister, Arvind Kejriwal-i metetdaktsü.
Iba dak alia asükwa mongpu nung kidanger state tem nung alu nung aliba ben-arongba agi mopung kanga menentsür, aser iba atemaji mera kar agia inyaktsü, ta paisa ashi.
Kejriwal-isa onük tenet aliba ‘Parali Pradushan’ action plan kübok odd-even scheme densema lir, iba dak alia anti-pollution masks lemtsütsü, lenmang aokba den tzü aintsü, süngdong atemtsü aser yimti nung mopung kanga menenba tesem 12 atema sentong temeja inyaktsü, ta metetdaktsü.
Anogo 12 tashi odd-even scheme benokba mapang nung gari registration number nung ajemdaker odd number garitem anogo ka nung aser tasüngnüji even number garitem ta melentepa senzütsü melatsü. 2016 küm nunga Jaunary ita aser April ita na nung iba scheme benoka liasü aser iba ozüng kübok aibelenertem dang senchi 2000 achi.
Kejriwal-isa, taruba anogotem nung iba indang scheme temettetsü osang nüburtem nem metetdaktsütsü, ta ashi.
Ajisüaka iba ozüng kübok motorbike/scooter aser gari anir tetsürtembo maittsü.
Central Pollution Control Board-i latetba graded response action plan (GRAP) kübok mopung menenba level ji kodang ghonda 48 dak tema ‘severe plus’ category kümdir idangji nija garitem atema odd-even scheme benoktsü melar.
Tesüiba ita 11 tashi Delhi nung mopung menenba jenjang ‘low’ liasü, ajisüaka November ita nungi tenzüka kidanger state tem nung alu nung ben-arongba agi Delhi nung tzüsü den mokozü meyoktepa mopung kanga menena Delhi ya ‘gas takdang’ ka ama kümdaktsür, ta chief minister-isa ashi.
“Centre sorkar den Punjab aser Haryana state sorkartemi alu nung ben-arongba nokdangtsü meranger, aser Delhi sorkaria akokba tashi parnok den yariteptsü,” ta paisa metetdaktsü.