Delhi nung school asemnü shibanger; Odd-Even scheme benoktsü

November 06, 2016 nü New Delhi nung NGO ‘My Right to Breathe’ züngsemtemi Delhi nung mopung menenba anema ‘Pollution free Delhi’ campaign ka akaba noksa nung angur. 

New Delhi, November 06 (Agencies): Delhi nung mopung menenba level tamajungba küma tanü Chief Minister,  Arvind Kejriwal-i, yimti nung aliba school tem Bodhbarnü tashi shibangtsü, ta metetdaktsüba den külemi construction aser demolition mapaten anogo pongunü nokdangba osang metetdaktsü.
Ano Badarpur Power Plant-a mapang tatsüka atema shibanga atatsü.
Rongdak Cabinet senden ka amenba sülen Kejriwal-i, yimti nung engineering artificial rain atema state sorkari Centre den o lemteptsü, kechiyong yimti ya “gas chamber” ka mesüka kümogo, ta ashi.
AAP sorkarisa yimti nung odd-even scheme maneni inyaktsü atema shisadangdar.
Chief Minister-i nüburtem danga ki telung nung dang alitsü aser iba tensa nung ajemdaker kokra pei kidang nungi dang mapa inyaktsü mepishiogo.
Paisa, yimti nung construction aser demolition mapa ajak anogo pongnü nokdanger aser jana arongertem nem temerenshi  agütsütsü, ta metetdaktsü.
Yimti anogo pongu nokdangtsü aser iba mapang nung auyi madoktsü atema yimti nung tzü aantsü.
Par kima osangbenertem den jembidang Kejriwal-i, “Taruba anogo asemnü school tem shibangtsü. Health department-i asüng temetettsü kar metetdaktsütsü. Onoki nüburtem dang pei kidang alitsü aser kokra kidang nungi dang mapa inyaktsü mepishir. Onoki odd-even tenzükshitsü atema renemdar. Onoki anogo ana asem tsüngda asadanger nüngdak dang süra iba mapatong benoktsü,” ta ashi.
Yashi Kejriwal-i Union Environment Minister, Anil Dave ajurua pa den Delhi nung mopung menenba atema o lemtepa liasü. Iba sülen Dave-i asüng Delhi aser kidanger state tem nungi environment minister tem senden ka ayongogo.
IIT Kanpur study ka ajanga yimti nung mopung menenba kuli rongnung Badarpur Thermal Power Plant (mijang amshiba) lir ta shiogo, aser iba Plant-a taruba anogo ternü shibangtsü, ta CM-isa ashi.
Yashi osangbenertem den jembidang Kejriwal-i, mokozü aser tzüsü meyoktepba agi akümba ‘smog’ ajanga Delhi yimti ya “gas chamber” ka mesüka kümogo, talisa iba ya kidanger Punjab aser Haryana na alutem nung aliba jana rongtokba ajanga lir, ta metetdakja liasü.